ILOILO CITY — Nagapanghakroy ang pila ka mga mangunguma sa Iloilo City bangud sa nagalala nga epekto sang El Niño sa ila nga mga tanum.
Sa interview sang Bombo Radyo kay Marivic Pastolero, Presidente sang Association of Farmers in Iloilo City, iya ginpahayag nga nagakulang na sila sang tubig nga pang-bunyag rason nga nagdesisyon na lang sila nga mag-untat tanum sang humay.
Suno kay Pastolero, bangud sa tuman ka init nga tyempo, ang tanum nila nga petchay nga kuntani ma-harvest sa sulod sang 18 days, sa subong, nagalab-ot na sang 25 days antes ma-harvest.
Ginpahayag man ni Pastolero nga nagdesisyon na lang sila nga magtanum sang mga ulotanon bangud ini ang wala gid nagakinahanglan sang madamo nga tubig pang-bunyag.
Bangud man sa tig-ilinit, nagnubo ang produksyon sang ila mga tanum kag kalabanan padiri ang nagakalaya.
