ILOILO CITY — Ginkumpirma ni Iloilo City Mayor Jerry Treñas nga interesado ang Aboitiz Group nga mangin bulk water supplier sa syudad kag probinsya sang Iloilo.
Sa interview sang Bombo Radyo kay Treñas, iya ginpahayag nga ang pagpakita sang interes sang kompanya ang kasunod man sang pagapanawagan sang syudad sa mga posible nga mangin water supplier ilabi na nga naga-eksperyensya ang syudad sang water shortage.
Suno kay Treñas, kun makadesisyon na ang nasambit nga komanya, posible nga mangin supplier man ini sa probinsya sang Iloilo sa diin nakaupod man sa pagsinapol si Iloilo Governor Arthur Defensor Jr.
Ginpahayag man sang alkalde nga dako ang mabulig sang Aboitiz Group kun matigayon nga makasulod ini sa syudad.
Ginkalipay naman sang alkalde ang ginpakita nga interes sang kompanya sa syudad.
Sa subong, wala pa sang klaro sa desisyon sang amo nga kompanya, sa diin
ginalantaw pa kun masarangan sang tubig sang Jalaur River, nga sa subong, padayon nga naganubo ang lebel bangud sa El Niño Phenomenon.
