Indi magnubo sa 71 ka mga indibidwal ang napatay kag 110 naman ang nagapabilin sa ospital kasunod sang pagbaha sa banwa sang Mai Mahiu sa pungsod sang Kenya.
Sa interview sang Bombo Radyo kay Charles Juma, isa ka manunudlo kag communication expert, iya ginpahayag nga madasig ang daludo sang baha bangud sa pagkaguba sang dam apang una man ginpahayag sang mga residente nga ang baha ang nagbaskog bangud sa hangin nga nagsulod sa railway bridge nga nagtuga sang pag-clog sang plugged culvert.
Suno kay Juma, may nagkala-anod nga mga salakyan, nagkalatumba nga puno, kag nagkalawasdak nga mga panimalay bangud sa mabaskog nga pagbaha sa north-western Nakuru county sang nasambit nga pungsod.
Ginpahayag man ni Juma nga may mga pila ka mga myembro sang pamilya nga naapektohan wala pa makit-an kag ginapatihan nga nalubong sa lay-on.
Padayon naman ang pagkutkot sang mga rescuers sa amo nga lugar agud matumod kun may mga survivors sa trahedya.
Sa subong, yara na sa 103 ang mga na-record nga napatay halin Marso tubtob subong kag linibo sa mga residente ang napilitan nga mag-evacuate bangud sa kalamidad.
Nahibaluan nga sugod sang Nobyembre 2023, ang El Niño Phenomenon ang nag-trigger sang paglapaw sang tubig sa mga suba sang Kenya nga nagtuga sang malapad nga pagbaha kag nagkuha sang ginatos nga kabuhi sang mga tawo.
