ANTIQUE — Ginkadtoan personal ni Department of Social Welfare and Development Region 6 Director Atty. Carmelo Nochete ang probinsya sang Antique kasunod sang komusyon nga natabo sa duha ka mga local officials sa Tobias Fornier.
Matandaan nga nagtapungulay sanday Mayor Ernesto Tajanlangit III kag Vice Mayor Jojo Fornier kahapon bangud sa tagtaganay sang food packs sa mga pumuluyo kasunod sang deklarasyon sang banwa sa state of calamity bangud sa El Niño Phenomenon.
Sa interview sang Bombo Radyo kay Director Nochete, iya ginpahayag nga una niya nga ginkadtoan amo ang Municipal Social Welfare and Development Office tuhoy sa natabo kahapon.
Sunod nga ginkadtoan sini ang opisina ni Mayor Tajanlangit kag nagstoryahanay tuhoy sa food packs nga ihatag para sa tanan nga pumuluyo sang Tobias Fornier.
Gin-athag ni Director Nochete sa mga opisyal nga dapat ang manguna sa tagtaganay sang ayuda amo ang MSWDO.
Apang kinahanglan man nga nakahibalo ang tanan nga opisyal sang banwa nahanungod sa schedule — adlaw kag oras sang distribution sang ayuda.
Suno sa regional director, kun luyag sang mga opisyal nga magbulig sa distribution pwede gid apang indi na paggamitan pa sang pamulitika.
Gin-athag man ni RD Nochete nga ang ihatag kuntani kahapon nga food packs ni Vice Mayor Fornier ang halin man sa DSWD nga gindala sa Antique Provincial Government inkaso nga may mga kinahanglan nga hatagan.
Nagabug-os sang 1,800 ka mga family food packs ang ihatag sa mga pumuluyo sang Tobias Fornier.
Sa pamangkot naman kun may gintago nga food packs, sabat ni RD Nochete, wala sang may gintago sa baylo ginpamutang lang temporaryo ang food packs sa warehouse nga wala mahatag kahapon bangud sa natabo.
Sa ulihe nga pag-istoryahanay sa tunga sang alkalde kag bise alkalde, pahayag ni Nochete, nagsugot sila nga magakooperar sila sa distribution sang ayuda sa diin ang manguna amo ang MSWDO.
Nagpahanumdom ang regional director sa tanan nga pulitiko nga likawan ang pamulitika sa tagtaganay sang ayuda.
