ILOILO CITY — Ginpaiway anay sang Iloilo City Traffic Management Unit (ICTMU) ang pagpangdakop sa mga colorum ukon unconsolidated public utility vehicle (PUV) sa Iloilo City.
Sa interview sang Bombo Radyo kay Ret. Police Colonel Uldarico Garbanzos, pinuno sang nasambit nga talatapan, iya ginpahayag nga magahatag sila sang tubtub sa Mayo 15 kag matapos sini, mangdakop na sila sang mga pampasahero nga jeep nga wala nag-consolidate sa gintalana nga deadline sang ahensya sang, April 30.
Suno kay Garbanzos, matapos ang 15 ka adlaw, magapangayo na sila sang bulig sa Land Transportation Office kag Philippine National Police agud dakpon ang mga indi consolidated nga jeep.
Suno kay Garbanzos, ang abiso ang naghalin sa Land Transportation Franchising and Regulatory Board (LTFRB) sa diin pwede pa nga makabyahe sa syudad ang mga colorum apang wala sang kasiguraduhan kun ma-cover sang insurance ang mga pasahero kun hinali nga may magluntad nga aksidente.
Ginpahayag man sang natungdan nga padayon ang stickering sa mga jeep sa syudad ilabi na sa first town municipalities sang Iloilo nga ginalantaw nga matapos buwas nga adlaw.
Nahibaluan nga isa ang stickering sa pamaagi agud matumod ang mga consolidated kag unconsolidated nga mga jeep.
