Nasiplatan ang Chinese-flagged research vessel nga nagalibot sa kadagatan sang Bicol kag Eastern Visayas sa diin natukiban nga ginpatay pa sini ang automatic identification system (AIS) sang vessel agud indi ma-locate sang Philippine authorities.
Suno kay Armed Forces of the Philippines spokesperson Col. Margareth Francel Padilla, indi sini ma-antisipar kun ngaa ginpatay sang Chinese vessel ang automatic identification system (AIS) sang barko.
Ginpahayag man ni Padilla nga ang amo nga system ang nagahatag sang locational positions sang barko kag kalabanan, ginagamit ang sistema sa mga vessels, pantalan, pila ka mga organizations sang bangko kag traders, ilabi na sa pagtuon kag rescue operations.
Nagpasalig naman ang AFP nga apisar sang presensya sang barko sang China, magapadayon sila sang pagpatuman sang maritime patrol sa amo nga lugar.
Nahibaluan nga ang Chinese vessel nga Shen Kuo ang una nga nakit-an sang Abril 25, nga yara sa 60.9 nautical miles sang Rapu-Rapu Island sa Albay.
Gintuyo man sang AFP nga i-contact ang nasambit nga barko paagi sa regular channels, apang wala sila nangin madinalag-on.
Una na nga ginpahayag sang Philippine Coast Guard (PCG) nga ang barko ang naghalin sa Shenzhen Port sang Abril 13 kag nag-agi sa Itbayat kag Basco, Batanes sang April 22.
Apisar nga may mga indikasyon nga nagapatuman sang marine research sa area ang barko, gin-athag sang Philippine Navy nga wala ini nagbayolar sang 1982 United Nations Convention on the Law of the Sea (UNCLOS).
Ginabantayan naman subong sang AFP ang hulag sang tatlo pa ka mga ginapahayag research vessels sang China sa West Philippine Sea.
