SARA, ILOILO – Kabug-usan nga P500 million ang budget nga gintalana para sa pinakadako nga Sports Complex sa Panay nga nahamtang sa Northern Iloilo State University – Victorino Salcedo Campus sa Sara, Iloilo.
Sa interview sang Bombo Radyo Iloilo kay Dr. Bobby Gerardo, Presidente sang nasambit nga unibersidad, iya ginpahayag nga ang sports complex ang may yara sang covered gymnasium, court stadium nga makaakomodar sang 2,500 tubtob 3,000 individuals, basketball court, field track, football court, lawn tennis court, volleyball court kag olympic-size swimming pool.
Suno kay Gerardo, madamo sang mga atleta sa quinto distrito ang masami nagapangibabaw sa patag sang hinampang kag tion na ini agud nga mahatagan sila sang venue para sa ila nga paghanas.
Posible nga maumpisahan na sa labing madali nga panahon ang pagpatukod sang Sports Complex kag ginalantaw nga matapos ini sa sulod sang duha tubtob tatlo ka tuig.
