Halos indi kita mahubsan sang ideya kun paano maumpawan subong nga binulan na nga nagatagiti ang init.
May yara nga pila ka beses nagapaligo sa isa ka adlaw, may nagahimo sang “do it yourself” nga air conditioner, may naga-paligo sa ice, may nagakonsumo sang halo-halo, kag madamo nga iban pa.
Sa Thailand, pinasahi pa gid ang napinsaran sang mga residente sa Phayuha Khiri District sa probinsya sang Nakhon Sawan agud nga bisan paano, makaulan man sa ila nga lugar kag matugnawan man ang palibot.
Abi mo kun ano ang ila ginhimo?
Nagparada sila kag ang ila nga dala amo ang Japanese cartoon cat nga si Doraemon!
Naka-costume pa ang mga nag-upod sa parada samtang nga ginsulod naman si Doraemon sa hawla kag samtang nagapadayon sila sa parade, ginabasyahan sang tubig sang iban nga mga residente ang nasambit nga kuring.
Daan na ini nga dry season ritual nga kilala nga “Hae Nang Meaw” ukon ang literal nga pagparada sa babaye nga kuring, apang sini nga tuig, indi buhi nga kuring kundi si Doraemon kag HelloKitty dolls ang bitbit sang mga tawo.
Ini ang kabahin sa ila pagpati nga ang kuring ang naangot sa pag-ulan kag ang ila pag-“meow meow” bangud sa ila kaugot kun mabasa sila amo ang nagatawag sa pag-ulan.
Nahibaluan nga indi basta-basta ang init sa Thailand kun sa diin sa south nga bahin particular sa Nakhon Si Thammarat province,
nagatiko na ang mga railway tracks kag kinahanglan pa nga mag-spray sang tubig ang railway workers agud nga mabalik ang husto nga shape sini.
Temporaryo man nga ginsirado ang alagyan sang tren kag ginsuspende anay ang operasyon bangud ginkaayo ang tracks nga nag-misalign bangud sa stress nga tuga sang tuman nga kainit.
