ILOILO CITY — Ginakabalak-an sang pila ka mga residente sang Barangay Sinikway kag Barangay Loboc, Lapuz, Iloilo City ang posibilidad nga indi madayon ang rehabilitation sang Budburan Creek.
Sa interview sang Bombo Radyo kay Punong Barangay Pancho Vijuan sang Brgy. Loboc, Lapuz, iya ginpahayag nga may ginpain na nga masobra P100 million nga pondo agud i-rehabilitate ang creek.
Suno kay Vijuan, indi pa masugudan ang rehabilitation sang amo nga creek bangud sa mga informal settlers nga naga-istar sa higad sini.
Ginpahayag man sang natungdan nga wala pa sang lokasyon nga nakita ang city government agud himuon nga relocation site sang mga mapahalin nga informal settlers.
Nahibaluan nga ang creek ang ginareklamo man sang pila ka mga residente bangud sa naga-pondo nga tubig kag wala naga-ilig.
Nagalaum naman ang mga opisyales sang nasakopan sang nasakopan nga barangay sang creek nga mapalapad ini agud nga indi na mag-awas kag magtuga sang pagbaha kun magtag-ululan.
