Nagapalanglapaw ang pagpasalamat sang Ilonggo nga rank 10 sa April 2024 Registered Master Electrician Licensure Examination.
Ini amo si Raphner Matunding Mendoza, sang Barangay Bolhog, Batad, Iloilo kag isa sa lima nga examinees nga nakakuha sang 85.50% nga rating.
Sa interview sang Bombo Radyo kay Mendoza, iya ginpahayag nga ginpangamuyo lang niya nga makapasar lang sa pasinawan, apang nagsobra pa ang ginhatag sa iya sang Diyos bangud nakasulod pa ini sa Top 10.
Suno kay Mendoza, tuig 2014 pa sang nakatapos ini sa kurso nga Bachelor of Science in Industrial Technology Major in Electrical Technology sa Northern Iloilo State University – Main Campus sa Estancia, Iloilo.
Matapos nag-graduate, nagtrabaho pa si Mendoza sang isa ka dekada antes nagkuha sang pasinawan.
“Masadya kay ang ginapangbudlayan mo sa pagtuon kag ang pagpulaw-ulaw, nagbunga gid sang maayo. Doble pa ang ginhatag niya [Diyos] bangud na-expect mo lang nga makapasar, apang nadala kapa sa top.”
Plano naman ni Mendoza nga magpadulong sa luwas sang pungsod agud magtrabaho kag mahatagan sang maayo nga pangabuhi ang iya ginikanan.
Nahibaluan nga ang Northern Iloilo State University sa diin ini nagtapos sa kolehiyo ang nakakuha sang 100 percent passing percentage sa nasambit nga pasinawan.
