ILOILO CITY – Maga-umpisa na bwas, Mayo 6 tubtub Mayo 10, ang online registration para sa Philippine National Police Entrance and Promotional Examinations.
Sa interview sang Bombo Radyo kay Atty. Michelle Benitez-Yotoko, spokesperson sang National Police Commission (NAPOLCOM) Region 6, iya ginpahayag nga antes makakuha sang examination, kinahanglan anay nga magpa-schedule sang appointment sa online scheduling system nga www.napolcom-noss.org.
Suno kay Yotoko, magasugod naman sang evaluation kag processing sang applications sa Martes, Mayo 7 tubtub Hunyo 5.
Diri sa Western Visayas, patigayunon ang examination sa Iloilo City kag Bacolod City sa Hunyo 30.
Para sa mga applicant nga civilian, nagakadapat nga indi magnubo sa 21 anyos kag indi magsobra sa 30 anyos ang edad sa adlaw sang pasinawan.
Dapat nga graduate sang four-year course.
Para sa Patrolman kag Patrolwoman naman, wala sang age requirement.
Ini ang bukas man para sa tanan nga mga kwalipikado nga uniformed personnel sang organisasyon nga luyag nga ma-promote ukon magpataas sang ila nga rangko.
Sa tion nga makabaton na sang notice sa petsa sang processing sang application, i-screen shot ini ukon i-print agud ipakita sa tion sang face-to-face processing sa Regional Office.
