Nalakip ang tiglawas sang Iloilo City nga si Alexie Brooks sa lima ka mga kandidata nga nagpanguna sa boto sa Swimsuit Challenge sang Miss Universe Philippines 2024 pageant.
Magluwas kay Brooks, sulod man sa Top 5 sanday Dia Maté sang Cavite, Patricia Bianca Tapia sang overseas Filipino community sa Hawaii, Ma. Ahtisa Manalo sang Quezon Province, kag Jet Hammond sang overseas Filipino community sa Southern California.
Suno sa organisasyon, ang winner sa sini nga challenge ang ma-determinar paagi sa boto sang fans kag ang top winner sa kada challenge amo ang awtomatiko nga makakuha sang spot sa Finals.
Sang nagligad nga tuig, ang winner sa Swimsuit Challenge nga nakakuha sang semifinal spot amo si Pauline Amelinckx sang Bohol nga amo man ang nakabaton sang Miss Supranational Philippines title kag nagpangaduha a 2023 Miss Supranational pageant.
Ang masunod nga round sang online voting sa national search amo ang “Up Close & Personal” personality interviews kun sa diin hatagan ang mga kandidata sang identical set sang tatlo ka mga pamangkot kun sa diin may tag-30 ka segundos agud makasabat sa kada question.
Nahibaluan nga 53 ka mga kandidata ang nagapaindis-indis subong nga tuig nga amo ang magabulos sa trono ni reigning queen Michelle Marquez Dee nga isa sa nakasulod sa Top 10 sang 2023 Miss Universe pageant sa Miss Universe pageant sa El Salvador sang Nobyembre 2023.
