Ginalantaw sang Department of Agriculture (DA) nga mas daku ang rice harvest subong nga tuig ipaanggid sa 2023 apisar pa sang nagapadayon nga epekto sang El Niño phenomenon sa Pilipinas.
Suno kay DA Assistant Secretary Arnel de Mesa, ginalauman sang ahensya nga magalab-ot sa 20.4 million metric tons ang humay nga ma-harvest sa 2024 nga mas mataas ipaanggid sa 20.06 million metric tons nga ani sang 2023.
Lakip sa ginalantaw nga factor sang ahensya amo ang mas maayo nga klase sang binhi kag ang mga interventions sang gobyerno.
Apang kun basehan lamang ang harvest sa una nga quarter, may pagnubo gid man suno sa department nga nagalab-ot sa 100,000 metric tons. Ini nga pierde ang mahapos lang mabawi suno sa iya paagi sa importasyon kun sa diin nagdangat na sa 1.6-million metric tons ang na-import sang pungsod.
Kumpyansa man ang opisyal nga bastante ang rice supply sa Pilipinas apisar sang report nga nagdangat na sa P5.9-billion ang balor sang halit sang init sa sektor sang agrikultura.
As of May 2 nga report, ang humay amo ang pinakaapektado kun sa diin ang total value loss ang yara na sa P3.1 billion, ginasundan sang mais nga P1.76 billion, kag high-value crops nga P958 million.
Ang pinakaapektado naman nga mga rehiyon amo ang Mimaropa, ang Cordillera Administrative Region, kag ang Western Visayas.
