Imagine kun yara ikaw sa eroplano nga may sakay man gali nga man-og!
Indi man delikado ang tanan nga man-og, apang may mga tawo abi nga naga-panic gid dayon kun makakita sini kag nagatuga sang komosyon.
Sa Miami International Airport sa Florida, isa ka pasahero ang nagtuyo nga dal-on ang iya nga man-og sa iya byahe.
Agud nga mahimo ini, ginsulod niya ini sa gamay nga pouch kag ginbutang sa iya nga delargo.
Apang wala gid naswertehan ang lalaki bangud wala nakalusot sa Transportation Security Administration (TSA) officials ang iya nga animal friends bangud nakit-an ang mga ini pag-abot sa security checkpoint.
Sunod nga nagpakig-angot ang otoridad sa US Customs and Border Protection kag sa Miami Dade Police Department agud nga matatapan ang amo nga bagay. Ginpadala man ang mga man-og sa Florida Fish and Wildlife Conservation Commission.
Ginpaathag naman sang US Department of Transportation nga ang federal kag state governments ang nagapatuman sang istrikto nga restrictions sa pagbyahe sang buhi nga mga sapat kag kada airline ang may yara man sang company policy kun paano ini ma-handle sang maayo kun sila ang yara sa transportasyon.
Indi ini ang una nga bes nga may nagtuyo nga magpalusot sang sapat bangud may yara man anay sang nagdala sang 4-foot boa constrictor para sa “emotional support” samtang isa naman ang nagbitbit sang orange nga kuring sa luggage apang palareho nga wala ginpasugtan sang paluparan.
