ILOILO CITY — Dakop ang mag-live in partner nga nagaduso sang iligal nga druga matapos nagpatuman ang drug buy-bust operation ang City Drug Enforcement Unit (CDEU) sa Barangay Cuartero, Jaro, Iloilo City.
Ang mga subject amo sanday alyas Barok, 47-anyos kag alyas Camille, 27-anyos.
Sa interview sang Bombo Radyo kay Police Lieutenant Antonio Benitez, head sang Iloilo City Drug Enforcement Unit (CDEU), iya ginpahayag nga nakuha sa mga subject ang 13 ka sachets sang suspected shabu lakip ang buy-bust items.
Suno kay Benitez, nagabug-at ang iligal nga druga sang 70 grams kag mag standard value nga P476,000.
Ginpahayag man sang natungdan nga si alyas Barok ang anay na nga nadakop sa amo man nga kaso samtang si alyas Camille ang yara ang pangalan sa Barangay Anti-Drug Abuse Council (BADAC) sang iya lugar.
May gintumod naman ang duha ka subject nga source nga ginakuhaan sang iligal nga druga apang gina-validate pa sang otoridad kun matuod ini.
Nagapangatubang naman ang mga subject sa kaso nga paglapas sa RA 9165 ukon Comprehensive Dangerous Drugs Act of 2002.
