Padayon nga ginatib-ong ni Alexie Brooks ang pangalan sang Iloilo City sa Miss Universe Philippines 2024 competition!
Matapos nahingadlan nga sulod sa Top 5 finalists sa Swimsuit Challenge, sulod man ang Ilongga beauty queen sa Top 5 sang Up Close and Personal Interview Challenge.
Magluwas kay Brooks, ang iban pa nga kandidata nga nakakuha sang pinakamataas nga boto sa interview amo sanday Patricia Bianca Tapia sang Hawaii, Stephanie Faye Gerona sang Quirino, Ahtisa Manalo sang Quezon Province, kag Christi Lynn McGarry sang Taguig City.
Ang winner sa sini nga challenge ang awtomatiko nga makakuha sang spot sa pageant finals.
Matandaan nga magluwas sa interview kag swimsuit, una naman nga nahingadlan si Brooks nga nalakip sa Top 3 sang Best in National Costume kaupod sa mga tiglawas sang Southern California kag Tacloban.
Ang masunod nga balantayan amo ang winners sa Runway Challenge. Napaguwa na ang videos sini kag mahimo na makaboto ang pageant fans sa ila paborito nga kandidata.
Patigayunon ang coronation night sang Miss Universe Philippines sa Mayo 22 sa Mall of Asia Arena kun sa diin igapasa ni reigning queen Michelle Dee ang korona sa iya successor nga amo ang magatiglawas sang Pilipinas sa international pageant sa Mexico.#
