CALINOG, ILOILO – Patay ang isa ka bata nga lalaki matapos nalumos sa suba sa Barangay Poblacion Delgado, Calinog, Iloilo.
Ang biktima amo si alyas Nonoy, pito ka tuig, residente sang nasambit nga lugar kag estudyante sang Calinog Elementary School.
Sa interview sang Bombo Radyo kay Police Senior Master Sergeant Ricky Lubas, imbestigador sang Calinog Municipal Police Station, iya ginpahayag nga naghagadanay ang biktima kaupod tatlo sini ka mga utod kag duha pa gid nila ka mga abyan nga magpaligo sa suba.
Apang sa ulihi, wala na matalupangdan sang iya mga utod nga naglusong na ang biktima sa suba.
Suno kay Lubas, nagpauli ang tatlo ka mga mag-utod kag ginsugid nila sa ila amay ang natabo.
Nagdali-dali naman padulong sa suba ang ila amay kag sang nagsalom ini, didto kag nakuha sini ang biktima.
Gindala pa sa ospital ang biktima, apang ginbawian gid sang kabuhi.
