ILOILO CITY – Padayon pa nga ginahibalo ang identity sang pickpocket nga nagbiktima sa empleyado sang Department of Public Works and Highways (DPWH) Region 6 samtang nagalakat sa Zone 4 Parola Concepcion, Iloilo City Proper.
Ang biktima amo si June Dela Peña, tumandok sang Maasin, Iloilo.
Sa interview sang Bombo Radyo kay Dela Peña, iya ginpahayag nga nagsakay siya s modernized jeepney halin sa Pavia, Iloilo kag nagpanaog sa atubang sang opisina sang Coast Guard Station – Iloilo sa Fort San Pedro Dr, Iloilo City Proper.
Suno kay Dela Peña, nagtabok ini sa dalan kag didto na ginsundan ini sang pickpocket samtang nagalakat padulong sa iya opisina.
Ginpahayag ni Dela Peña nga nagasuksok siya sang backpack sa diin nasulod ang iya cellphone kag wallet nga amo ang ginkuha sang pickpocket.
Base sa kuha sang Closed-circuit television (CCTV), nakasuksok ang pickpocket sang puti ng kalo, puti nga t-shirt, naka-maong nga dilargo kag may orange nga backpack.
Gin-athag sini nga wala siya sang may nabatyagan nga ginakuot na ang iya bag sa diin pag-abot sini sa iya opisina, amo na lang niya namutikan na bukas na ini.
Sang ginbalikan sini ang iya gin-agyan, didto kag ginhambalan ini sang security guard sang Department of Environment and Natural Resources Region 6 nga may nakita ini nga lalaki nga nagakuot sang iya bag kag sa ulihi nagsakay sa jeep padulong sa Iloilo City Proper.
