ILOILO CITY — Ginakahangawaan sang Iloilo City General Services (GSO) ang mga nagakalalaya nga palm trees sa center island sang Diversion Road, Iloilo City.
Sa interview sang Bombo Radyo kay Engr. Niel Ravena, pinuno sang nasambit nga talatapan, iya ginpahayag nga indi na masarangan sang mga tanum ang epekto sang El Niño sa syudad ilabi na nga na-record ang Diversion Road nga isa sa mga pinakamainit nga parte sang Iloilo City.
Suno kay Ravena, tuyo nga panghalinon ang royal palm trees sa garden of love, esplanade, kag mga plaza sa syudad agud indi na madungan ang numero sang mga nagakalalaya nga kahoy.
Ginpahayag man sang natungdan nga nagpakonsulta na ang GSO sa architect sa diin, ginaduso nga itanom ang native trees bangud malapad ang handong nga mahatag sini kag makabulig panubo sang extreme heat sa syudad.
Plano naman sang talatapan nga gub-on ang concrete sa idalum sang center Island agud maka-penetrate ang ugat sa idalom kag makapanggamot ini.
