ILOILO CITY- Nadakpan na ang suspek sa pagransak sa drug store nga ginapanag-iyahan sang Jaro Archdiocesan Social Action Center (JASAC) sa Sta. Filomena, Arevalo, Iloilo City kun sa diin nataban ang ginabanta P50, 000 nga kwarta.
Ini amo si Jonathan Nadayag, 44, residente sang amo nga lugar.
Sa interview sang Bombo Radyo kay Police Captain Benjie Dicen, hepe sang Arevalo Police Station, iya ginpahayag nga si Nadayag ang nadakpan sa ginpatigayon nga buy-bust operation sa Zone 10, Barangay Calaparan, Arevalo, Iloilo City.
Suno kay Dicen, natukiban man nila nga si Madalag ang nagpangawat sa nasambit nga botika base man sa iya hulag nga nakuha sa Closed-circuit television (CCTV).
Una diri, ginpadulungan sang mga pulis ang balay sang suspek kag didto nakita ang motorsiklo nga iya ginkawat sa Mandurriao, Iloilo City.
Magluwas sa kaso nga paglapas sa RA 9615, pasakaan man ini ang kaso nga robbery kag theft.
