POTOTAN, ILOILO – Magapatigayon ang Department of Environment and Natural Resources (DENR) sang validation sa treatment plant sang South Balibago Waterworks sa Barangay Bongco, Pototan, Iloilo.
Ini ang kasunod man sang pagkumpirma sang nasambit nga water utility nga may natabo nga saltwater intrusion sa source sang ila tubig nga nagresulta sa temporaryo nga pag-shut down sang ila planta.
Sa interview sang Bombo Radyo kay Livino Duran, Regional Executive Director sang DENR Region 6, iya ginpahayag nga nakibot ini sang nabaton ang nasambit nga impormasyon.
Suno kay Duran, luyag sini nga mahibaluan ang ano kadalom ang source sang tubig sa planta.
Una diri, ginkumpirma sang nasambit nga water utility na ang high tide amo ang rason sa pagtaas sang level sang Total Dissolved Solids sa diin nagdangat ini sa 2,600 Parts per million.
Nahibaluan nga may kalayuon nga 8 kilometers sa baybay ang nahamtangan sang planta nga amo ang ginatudlo nga rason kun ngaa susceptible ini sa pagsulod sang saltwater.
Sa subong, ginpasigurado sang water utility nga safe na ang ila tubig agud ikunsumo.
Nahibaluan nga lakip sa mga ginaserbehan sang water utility amo ang pila ka mga lugar sa Iloilo City sa diin kadam-an diri ang sa distrito sang Jaro kag mangin sa Leganes kag Zarraga sa Iloilo Province.
