Madamo ang nahangawa sa health condition sang komedyante nga si Boobay matapos ini nga natumba sa stage samtang naga-host sang town fiesta sa Aparri, Cagayan.
Kaupod sini ang isa pa ka komedyante nga si Pepita Curtis sang natabo ang insidente.
Nakit-an sa livestream nga gulpi lang nga nag-untat sa pagkanta si Boobay samtang nga naga-focus ang camera kay Pepita. Pila ka segundos ang nagligad, natumba na ini kag ginbuligan sang staff members.
Bangud sa natabo, gilayon nga nag-commercial break ang livestream samtang ginklaro naman ni Pepita nga na-outbalance lang ang iya upod.
Sang naka-recover na, nagbalik si Boobay sa stage kag ginpadayon ang iya nga performance. Ginklaro man ni Sparkle vice president Joy Marcelo nga natumba lamang si Boobay bangud nasilawan ini sang lights sa stage.
Gin-athag man sang iya co-host nga si Pepita nga wala sang problema kay Boobay kag nagpahuway ini sa hotel pagkatapos sang programa sa Aparri.
Sang Abril sang nagligad nga tuig, matandaan nga natabo man ini sa nasambit nga comedian sa tunga-tunga sang interview kay Boy Abunda. Gulpi na ini nga wala nagsabat kag nagakaurungan lamang apang sang ulihi naumpawan man.
Ginpahayag sini nga nagaka-eksperyensyahan pa sini ang pila sa aftereffects pagkatapos sang stroke nga iya naagyan sang 2016.
