Liwat nga ginhingadlan sang National Basketball Association (NBA) ang Denver Nuggets center nga si Nikola Jokic bilang Most Valuable Player (MVP) nga amo pa ang naglinya sa iya pangalan sa iban nga all-time greats sa basketball!
Ini na ang ikatatlo nga tion sa apat ka seasons nga nadag-an sang 29-anyos nga Serbian star ang nasambit nga prestihiyoso nga award. Nakuha man niya ini sang 2021 kag 2022, apang nangin runner-up lamang sa voting sang 2023 apang ginpangunahan man sini ang Nuggets nga matus-on ang ila labing-una nga NBA title.
Sini nga season, ginlutos ni Jokic sa award si Oklahoma City Thunder guard Shai Gilgeous-Alexander kag Dallas Mavericks guard Luka Dončić nga pareho man nga finalists.
May average siya nga 26.4 points, 12.4 rebounds kag 9.0 assists sa regular season. Nangin ikaduha man siya nga player, sunod kay Oscar Robertson, nga nakarekord sang 2,000 points, 900 rebounds kag 600 assists sa isa lang ka season.
Ang iya 25 triple-doubles kag 68 double-doubles ang pareho man nga nagapangaduha sa liga.
Kaupod ni Jokic sa three-time winners sanday Moses Malone, Larry Bird kag Magic Johnson matapos nakakuha sang 79 nga first-placed votes ipaanggid sa 15 nga nakuha ni Gilgeous-Alexander kag apat kay Doncic.
Ini nga kadalag-an sang Serbian star ang nagamarka man sang ikaanum nga sunod-sunod nga season nga ang MVP award ang nabulsa sang player nga nabun-ag sa guwa sang Estados Unidos sang Amerika. Ang katapusan nga US-born player nga nakadaog sini amo si James Harden sang 2018.
Nahibaluan nga matapos nalutos ang Los Angeles Lakers sa first round sang playoffs, duha man ka magkasunod nga kalutusan ang naangkon sang Nuggets sa kamot sang Minnesota Timberwolves sa Western Conference semi-final series.#
