Nagdangat sa pito ka oras ang negosasyon sa tunga sang kapulisan kag suspek nga nagluthang-patay sa isa ka pharmacist sa Barangay Mat-y, Miagao, Iloilo, apang bangud sa pagbato sini sa otoridad, nasamaran man ini kag ginbawian gid sang kabuhi.
Ang biktima nga pharmacist amo si Pio Javier nga nagapanag-iya sang isa ka botika sa banwa kag bana sang isa ka doktor; samtang ang suspek naman amo si Renato Fredecilla, residente sang amo nga barangay kag ginapatihan nga nagasuprer sang nervous breakdown.
Base sa imbestigasyon sang kapulisan, nagpadulong sa lugar si Javier agud maglantaw lang sa lote nga plano sini kuntani nga baklon.
Ginpahayag nga nakaistoryahanay pa ang duha antes nagsulod sa ila balay ang suspek kag pag-guwa sini, may dala na nga armas kag ginluthang ang biktima.
Igo sa guya nga naglusot sa ulo ang naangkon sang pharmacist nga rason sang iya kamatayon.
Sunod nga nagpanago ang suspek sa iya balay kag ginpangsiradhan ang puertahan kag ang mga bintana.
Sa interview sang Bombo Radyo kay Police Captain Francis Donne Lomahan, hepe sang Miagao Municipal Police Station, iya ginpahayag nga ‘las singko sa hapon sang nagpangayo na sila sang bulig sa utod sang suspek agud istoryahon ini kag magsungka sa otoridad.
Wala nagsabat ang suspek apang sang ulihi, naglingling ini sa bintana kag gintiro sang duha ka beses ang kapulisan amo nga diutayan lang ma-igu ang hepe.
Nagbalos man sa pagpalupok ang kapulisan kag sang ulihi, nagtawag na sang dugang nga pwersa halin sa Iloilo Police Provincial Office (IPPO) partikular sa Special Weapons And Tactics (SWAT) team.
Sang nag-abot ang augmentation, gintuyo nga sudlon ang balay apang nagpadayon sa pagpalupok ang suspek.
Suno kay Lomahan, ginhimo na sang pulis ang tanan kaangay sang paggamit sang megaphone agud ma-istorya ang suspek, kag sang ulihi, bangud wala sang sabat kag padayon sini nga pagbato, naggamit na sang tear gas ang kapulisan.
Ginpaligad pa ang 30 minutos kag ginsulod ang balay. Didto nakit-an nga may pilas na ang suspek kag na-recover man sa possession sini ang pusil nga ginapatihan .45 caliber pistol.
Gindala ini sa ospital apang gindeklarar nga dead on arrival. Indi pa matumod sang kapulisan kun paano sini naangkon ang patal nga pilas.
𝑩𝑨𝑪𝑲𝑮𝑹𝑶𝑼𝑵𝑫 𝑺𝑨𝑵𝑮 𝑺𝑼𝑺𝑷𝑬𝑲
Ginkumpirma sang mga kasilingan sang suspek nga wala ini sa iya husto nga paminsaron sa sulod na sang malawig nga panahon.
Sa interview sang Bombo Radyo kay Loly Tejado, iya ginpahayag nga nag-umpisa nga nag-angkon sang problema sa paminsaron ang suspek humalin sang may napatay ini nga myembro man sang iya pamilya.
Suno kay Tejado, bangud sa natabo kay Fredecilla, nagaisahanon na lang ini nga nagaistar sa ila balay.
Ginkumpirma man sang Miagao Municipal Police Station nga matuod nga nakaagi na preso sang una si Fredecilla bangud sa shooting incident kun sa diin pakaisa man sini ang iya nabiktima.
‘𝑾𝑬 𝑬𝑿𝑯𝑨𝑼𝑺𝑻 𝑨𝑳𝑳 𝑷𝑬𝑨𝑪𝑬𝑭𝑼𝑳 𝑴𝑬𝑨𝑵𝑺 𝑷𝑨𝑹𝑨 𝑴𝑨𝑷𝑨𝑺𝑼𝑲𝑶 𝑺𝑨𝑵𝑨 𝑺𝑰𝒀𝑨’
Mangin si IPPO Director Police Colonel Bayani Razalan ang nag-upod man sa pwersa sang kapulisan samtang padayon ang negosasyon.
Wala sang reported nga nasamaran sa kapulisan kag mga sibilyan kasunod sang insidente.
“Humihingi po ako ng paumanhin sa mga kababayan natin sa Iloilo.. sa Miagao. Hindi naman to inaasahan na pagkakataon. Normal police operations po yung ginawa natin. Ang importante kasi dito, we exhaust all peaceful means para mapasuko sana siya pero pinilit niya na lumaban sa atin,” kabahin sang mensahe ni Razalan.#
