Ginlutos sang Creamline Cool Smashers ang sister team sini nga Choco Mucho Flying Titans sa imbukada nga hampang sa Premier Volleyball League (PVL) 2024 All-Filipino Conference best-of-three finals.
Sa atubang sang masobra 17,400 ka volleyball fans sa Smart Araneta Coliseum, naka-recover ang defending champions sa kabos nga puntos sa opening set kag ginpakita ang determinasyon nga madepensahan ang titulo, 24-26, 25-20, 25-21, 25-16.
Nangin makahalawat-hawat pa ang ikapaat nga set sang nawigit sa puntos ang Cool Smashers, 9-5, antes napatas ang skor sa 13.
Ang net touch error sa Choco Mucho ang nangin lyabe para makakuha sang lead ang Creamline tubtub nga nakuha ang control sa set, napasaka sa pito ang antad, 21-14, tubtub dalayon nakuha ang kadalag-an sa Game 1.
Naka-21 puntos si Jema Galanza nga amo ang Player of the Game samtang may 17 points naman si Tots Carlos.
Sa Flying Titans, may game-high nga 27 puntos si Sisi Rondina samtang naka-15 puntos naman si Royse Tubino.
Balantayan ang Game 2 sa Domingo, Mayo 12, sa amo gihapon nga venue.
Pananglitan magdaog pa liwat sa ikaduha nga hampang, ini na ang mangin ika-walo nga kampyonato sang Creamline sa liga kag ikaduha nga sunod-sunod pagkatapos sang Second All-Filipino Conference sang 2023 season sang PVL. Ini man ang ila makabig nga balos sa Flying Titans nga nakakuha anay sang breakthrough five-set win batok sa ila sang ginpatigayon ang semifinals isa ka semana na ang nagligad.#
