Kun ang tawo halos mapatay sa kakulba sa tion nga ma-trap sa balay kun may baha, amo man sini ang nabatyagan sang mga sapat.
Amo ini ang sitwasyon sa Brazil kun sa diin pila ka adlaw na nga lapnagon ang baha, linibo ang nagbakwit, masobra 100 ka tawo ang patay, kag masobra man 100 ang missing.
Isa sa nakaagaw sang atensyon sang tanan amo ang isa ka kabayo nga makaluluoy ang sitwasyon bangud isahanon ini nga nagatindog sa atop kun sa diin nagalumapaw ang tubig-baha.
Ginpahayag nga duha ka adlaw na nga amo sini ang iya posisyon sa rooftop sang farmhouse sa Canoas sa southern Brazil.
Mangin ang mayor sang banwa ang nagpanawagan man sa otoridad nga luwason ang sapat antes ini mahulog sa iya ginatindugan.
Sa pagbuligay sang volunteer rescuers kag army vets, nabuligan ang kabayo kag nasaylo sa Zodiac inflatable boat agud nga madala ini sa hilway nga lugar.
Nahibaluan nga halos suba na subong ang sitwasyon sa mga dalan sa Rio Grande do Sul kag masobra naman sa 164,000 ka mga residente ang na-displace bangud sa mabaskog nga pag-ulan nga gina-forecast nga magalawig pa sa masunod nga mga inadlaw.#
