ILOILO CITY — Ginalantaw sang Philippine Travel Agencies Association (PTAA) nga posible magtuga sang negatibo nga epekto sa ekonomiya sang Pilipinas ang mas hugot nga visa rules para sa mga Chinese nationals nga nagapadulong sa pungsod.
Suno kay PTAA president Evangeline Tankiang Manotok, ang Chinese tourists ang isa sa major source sang income sang pungsod sa diin ang pagpahugot sa ila visa rules ang posible makatuga sang epekto sa turismo kag negosyo.
Una na nga ginpahayag sang Department of Foreign Affairs nga mas hugton sang Pilipinas ang visa requirements para sa mga turista nga Chinese bangud man sa mga peke nga aplikasyon nga nabaton sang embahada kag konsulado sang pungsod sa China.
Suno naman kay Foreign Affairs Undersecretary Jesus Domingo, tinutuyo sang tikang nga matumod ang “illegitimate and unsavory” ukon peke nga mga turista kun ikumpara sa lehitimo.
Nahibaluan nga anay na nalakip ang pila ka mga Chinese nationals sa organized crimes kaangay sang human trafficking, prostitution, kidnapping, kag fraud.
Ginalantaw naman ni Manotok nga posible likawan sang mga lehitimo nga turista kag investors ang Pilipinas bangud sa bag-o nga polisiya nga may posibilidad nga makaapekto sa hotel kag sektor sang accommodations.
Ginpahayag man sini nga agud malikawan ang diskriminasyon, nagakadapat nga siguraduhon sang gobyerno nga patas kag klaro ang bag-o nga polisiya.
Nahibaluan nga santo sa Department of Tourism, masobra 140,000 ka mga Chinese ang nagpadulong sa pungsod sa una nga apat ka bulan sang 2024, sa diin mas doble kun ikumpara sa nagligad nga tuig.
