Samtang malipayon nga ginselebrar sang iban nga mga iloy ang Mother’s Day, ginkumpirma naman sang actress kag fashion icon nga si Heart Evangelista nga nahulugan ini sa ikaapat na nga tion.
Ginpaagi ini ni Heart sa iya ka sulat para sa iya kuntani anak nga lalaki nga si “FrancisKo.”
Base sa sulat, preparado na kuntani ang aktres nga makit-an ang iya bata apang nag-untat sa pagpitik ang korason sini samtang nga yara pa lamang ini sa taguangkan ni Heart.
“I was sure to meet you soon. I had prepared a few things that you may like but for some reason your beating heart lost its way to us,” kabahin sang handwritten letter.
Apisar nasubuan gid sa sini nga sitwasyon, ginpasalamatan man ni Heart ang ila kuntani “fourth angel” bangud sa pagpalangga kag paglaun sini nga nahatag apisar nga wala pa ini nakaguwa sa kalibutan.
“I will keep my heart intact while you find your way back to us. Your beating heart has healed me in so many ways…Thank you for still trying to be with me and for making me feel so much love already,” pahayag pa sini.
Ini na ang ikaduha nga tion subong lamang nga 2024 nga nagsapubliko ang fashion personality nga nahulugan ini.
Sang Marso, matandaan nga ginkumpirma man sini nga may baby girl kuntani sila ni Senator Chiz Escudero nga ginpangalanan sini nga si Sophia Heart apang nadula man sa ila antes ang ila pag-renew sang ila wedding vows sa Balesin.
2015 sang nagpakasal ang senador kag ang aktres. 2018 sang gin-anunsyo ang iya pagbusong sa ila una kuntani nga anak kag sang ulihi ginkumpirma nga kapid gali apang magkasunod man nga nadula sa ila.
