Ginplastar sang isa ka producers’ group nga kinahanglan mag-import ang Pilipinas sang tubtub 200,000 metric tons (MT) sang kalamay agud nga malikawan ang kakulangan sa suplay ilabi na bangud sa halit nga natuga sang El Niño phenomenon sa mga plantasyon sang tubo partikular na sa Negros Occidental.
Suno kay United Sugar Producers Federation (UNIFED) president Manuel Lamata, pat-od nga daku gid ang epekto sa local sugar production kag indi siya sigurado kun maka-recover ang sugar farmers bisan pa mag-ulan na.
Pananglitan mag-ulan, magasugod sa pagtanum ang farmers apang may “gap” na suno sa iya samtang nga ginahulat ang harvest — rason nga kinahanglan nga magpasulod anay sang imported sugar sa mga mercado.
Matandaan nga una na nga ginpahayag ni anay agriculture secretary Leonardo Montemayor nga underreported ang halit nga natuga sang El Niño sa sector sang agrikultura.
Ginsiling man sini nga si former Sugar Regulatory Administration chief Rafael Coscolluela ang nagpaandam na nga ang sugar production sa Negros ang ginalantaw nga magnubo sang 30 percent sa tunga sang nagakatabo nga drought.
Lakip man sa ginaduso sang sugar farmers sa Agriculture Department amo ang pagtutok sa paghatag sang irrigation equipment agud mabatuan kag mapahagan-hagan ang epekto sang init.#
