May tawgon kita subong nga Supermom!
Istorya ini sang isa ka 40-anyos nga iloy nga si Tamiah Brevard-Rodriguez sa NewJersey sa Estados Unidos sang Amerika.
Sang kaagahon sang nagligad nga Abril, ginatapos na ni Tamiah ang iya PowerPoint nga gamiton sini agud depensahan ang iya dissertation nga naka-schedule sa amo nga adlaw. Ini para sa iya doctorate sa Rutgers Graduate School of Education nga duha ka tuig sini nga ginbaka-bakahan kag amo na lang ini ang kulang agud maka-graduate siya kag maka-enjoy na sa summer.
Apang sang amo man nga kaagahon, indi halos mahibaluan ni Tamiah ang iya batyagon sang naglupok na ang iya panubigan kag nakahibalo siya nga mabata na gid siya!
Bisan malipayon siya nga mabata na siya, indi ini malubos-lubos bangud pila ka oras na lang ang nabilin kag kinahanglan na sini depensahan ang dissertation.
Dali-dali sila nga nagpaospital apang wala na gid nakahingagaw sa birthing center bangud samtang yara pa lang sa salakyan, nagguwa na si baby boy nga ila ginpangalanan nga Baby Enzo.
Naka-settle na si Mommy Tamiah sa labor delivery room samtang nga gintawgan naman sang partner sini ang iya nga eskwelahan agud nga mangayo sang konsiderasyon kag ipostpone lang ang dissertation bangud sa pagbata ni Tamiah.
Apang mismo si Tamiah na ang nagdesisyon nga indi na lang pag-ipostpone bangud basi kun ma-delay naman sa bag-o nga schedule kag maatrasar ang iya paggraduate.
Sa bulig sang hospital staff, gintatap anay si Baby Enzo sa nursery kag ginbutangan sang card ang puertahan agud malikawan ang interruptions.
Nag-ilis sang bayo ang mommy, nag-makeup, nag-atubang sa laptop kag ginpresentar ang iya nga dissertation nga nahanungod sa standards para sa black women sa kolehiyo kun sa diin mas madamo ang white nga mga tawo.
Isa ka oras ang presentasyon sa atubang sang 56 ka tawo, kag suno kay Tamiah, grabe man ang iya transition halin sa mommy brain pakadto sa scholar brain agud lamang matapos sini ang iya doctorate degree.
Wala gid siya nagsala bangud sini nga summer, indi lamang si Baby Enzo ang nagdugang sa ila pamilya kundi natuman pa ang handum sini nga maka-graduate bilang doctor sa education halin sa Rutgers Graduate School of Education.#
