ILOILO CITY — Pasakaan sang kaso nga reckless imprudence resulting to physical injury sang Article 365 sang Revised Penal Code ang suspek nga nag-hit and run sa isa ka estudyante dalan sang Compania St. Salvacion, Habog-habog, Molo, Iloilo City.
Sa interview sang Bombo Radyo kay Police Master Sergeant Toto Carl Petalco, Traffic Investigator sang Iloilo City Police Office, iya ginpahayag nga na-trace na ang nagpalagyo nga driver sang SUV kag nakatalana na ini nga pasakaan sang kaso.
Suno kay Petalco, samtang nagatabok ang biktima nga estudyante sa dalan sang Compania Salvacion, Habog-habog na-sideswipe ini sang nasambit nga salakyan, sa diin nagpalagyo pa ini.
Ginpahayag man sang natungdan nga nag-agum sang pilas kag pagnalakit sang lawas ang biktima.
Una na nga ginpahayag nga nagduha-duha ang estudyante sa pagtabok, rason nga nasag-idan ini sang SUV.
Ginahulat naman sang otoridad kun magapasaka man sang kaso ang pamilya sang biktima batok sa nasambit nga driver.
