ILOILO CITY — Gin-athag ni Iloilo City Councilor Atty. Sedfrey Cabaluna nga indi ini magkontra kay Iloilo City Mayor Jerry Treñas bilang alkalde sa 2025 elections apisar nga may nagalapta nga huring-huring kaangot diri.
Sa interview sang Bombo Radyo kay Cabaluna, iya ginpahayag nga full support ini sa pagpamalakad ni Mayor Treñas sa syudad kag wala ini sang ano man nga plano nga magseparar sa linyada sang alkalde.
Suno kay Cabaluna, nagalaum siya nga mahatagan liwat sang tyansa nga makaupod si Treñas bilang iya nga konsehal sa pagserbisyo sa syudad kag mga Ilonggo.
Ginpahayag man sini nga madamo pa siya sang asin nga kaunon agud mangin isa ka Mayor bangud indi ini isa ka lahog-lahog nga responsibilidad.
Nagpasalamat man ini sa mga tawo nga nakita ang iya kapasidad nga makasarang mangin alkalde, apang sa subong, madamo pa siya sang kinahanglan nga matun-an bilang konsehal sang syudad.
