ILOILO — Nagapanindugan si Iloilo 3rd District Board Member Matt Palabrica nga dapat pangitaan sang pamaagi sang Provincial Government ang kinahanglanon nga tubig sang mga pumuluyo sang probinsya kasunod sang pagdeklara sang State of Calamity bangud sa El Niño Phenomenon.
Sa ginpatigayon nga regular session sang Sangguniang Panlalawigan, nagpabutyag sang pagkabalaka si Board Member Palabrica bangud wala malakip ang supply sang tubig para sa mga pumuluyo nga isa sa mga mitigating measures kuntani sang Provincial Disaster Risk Reduction and Management Council subong nga yara ang probinsya sa drought condition.
Ginpaboran man ni Provincial Disaster Risk Reduction and Management Office Head Mr. Cornelio Salinas ang water distribution schemes apang nagakadapat nga long term ang mangin solution base sa Provincial Task Force El Niño.
Sa problema sang tubig suno kay Salinas, mahimo man nga maka-request ang Local Government Unit sa ila opisina sa procurement sang water tank ukon gamiton ang fire truck sang Bureau of Fire Protection sa water rationing.
Apang pahayag ni board member Palabrica, kinahanglan nga lantawon ang kamatuoran nga nagakatabo sa komunidad sa diin ginakulang gid ang komunidad sang tubig.
Dapat gid kuntani dugang sang board member nga mahatagan man sang provincial government sang intervention ang supply sang tubig.
Nagapanindugan man si Palabrica nga indi dapat paggamiton ang fire truck sang Bureau of Fire Protection para maghatag sang tubig bangud tuman ini ka delikado sa tion nga may sunog.
