Kun agaw-atensyon ang istorya sang mga tigulang nga pursigido gihapon sa pag-eskwela apisar sang ila edad, may yara man sang baliskad nga mga kaso: mga tawo nga nagapanglakaak na ang nalab-utan sa edukasyon apisar lamharon pa lamang.
Kaangay sining isa ka dalaga sa Chicago, USA nga nagkadto sa iya graduation ceremony subong nga bulan matapos nga nakumpleto na ang iya nga doctoral degree sa edad nga 17.
Suno kay Dorothy Jean Tillman II, na-homeschool siya umpisa sang bata pa lamang tubtub nga nagsulod siya sa kolehiyo sa edad nga 10 ka tuig.
Samtang ang mga kaedaran sini ang yara pa lamang sa middle school, nagpadayon si Dorothy sa pagsulod sa klase sa College of Lake County sa northern Illinois kun sa diin nagtuon siya sang psychology kag nakumpleto ang iya nga associate’s degree sang 2016.
Nakuha man sini ang bachelor’s in humanities halin sa Excelsior College sa New York sang 2018.
Sang 2020, may yara na siya sang Master of Science degree, kag isa ka tuig ang nakalidad, sa edad nga 15, nabaton siya sa Doctorate of Behavioral Health Management program sa Arizona State University.
Sang Disyembre 2023, sa edad nga 17, madinalag-on sini nga nadepensahan ang iya dissertation nga requirement sa iya nga doctoral degree sa integrated behavioral health halin sa College of Health Solutions sa amo nga unibersidad.
Sang Mayo 6, halos tanan nagalantaw sa iya sang yara na ini sa spring commencement ceremony sang buluthuan.
Ini ang rason kun ngaa ginatawag siya sang iya mga pamilya kag abyan sa isa pa ka pangalan: “Dorothy Jeanius.”
Sa tanan nga iya nadangatan, tuman gid ang pagpasalamat ni Dorothy sa bulig sang iya nga iloy kag Lola nga amo ang nagsustiner sa iya agud mabulsa ini nga kadalag-an sa edukasyon. “I’m really just grateful that the world is my oyster, and that I’ve done so much so young. And I have time to kind of think that through.”
Mangin ang mga manunudlo ang nagadayaw man sa dedikasyon ni Dorothy. Siya ang pinakabata sa maragtas sang Arizona State University nga nakaangkon sang doctoral degree sa integrated behavioral health.
“It’s a wonderful celebration … but this is still something so rare and unique. She has innovative ideas and motivation, which is wonderful, and truly, I think what is inspiring is that she embodies that meaning of being a true leader,” pahayag ni Dr. Lesley Manson, isa ka clinical associate professor sa ASU.
Nagalaum man ini nga madamo pa ang ma-inspire ni Dorothy bangud sa iya pinasahi nga pagpalangga sa pagtuon: “That curiosity is always there, and I think all learners come with that, but it’s great to be able to see it in someone so young as well.”#
