Kinahanglan nga dag-on sang reigning champions nga Denver Nuggets ang ila hampang sa Game 6 batok sa Minnesota Timberwolves subong nga adlaw, Mayo 17, agud dalayon na nga maka-abanse sa Western Conference Finals.
Balantayan ini nga hampang 8:30 subong nga aga (oras sa Pilipinas).
Pabor sa Denver ang serye, 3-2, apang gamiton naman sang Timberwolves ang home court advantage bangud magabalik na sa Target Center sa Minneapolis ang sambuwa.
Matandaan nga nakahingagaw-abanse ang Nuggets sa serye sa bulig sang three-time MVP nga si Nikola Jokic nga may 40 points, 13 assists, kag seven rebounds sa 112-97 nga kadalag-an batok sa Timberwolves sa Game 5. Pananglitan mabaliskad sang Timberwolves ini nga resulta subong nga adlaw, maga-diretso ang duha ka teams sa makahalawat-hawat nga Game 7.
Pareho nga nakalista sa injury report ang starting point guard sang duha ka teams subong nga Game 6.
Duha ka players ang yara sa injury report sang Nuggets nga amo sanday Jamal Murray kag Vlatko Cancar samtang kwestyonable naman nga makahampang si Mike Conley para sa Minnesota. Ginklaro man sang team nga available ang ila star players nga sanday Anthony Edwards, Karl-Anthony Towns, kag Rudy Gobert para sa sini nga do-or-die game.
Sa Eastern Conference naman, kahapon, Mayo 16, labing-una nga naka-abanse ang Boston Celtics sa finals matapos ginlutos ang Cleveland Cavaliers sa Game 5, 113-98. Ini na ang ikatatlo nga sunod-sunod nga Eastern Conference finals appearance sang Celtics kag maga-atubang sa winner sa tunga sang New York Knicks kag Indiana Pacers.#
