ILOILO CITY — Natigayon na nga maguba sang pison ang 157 ka mga modified mufflers subong nga adlaw nga nakumpiska sang Iloilo City Government.
Sa interview sang Bombo Radyo kay Iloilo City Mayor Jerry Treñas, iya ginpahayag nga ang pagguba ang patimaan sang hugot nga pagbantay sang syudad kag indi pagtolerar sang magahod nga modified mufflers.
Suno kay Treñas, sa kabug-usan nga 157 ka mufflers nga nakumpiska, 31 diri ang nakuha sang Iloilo City Police Station (ICPO), 119 naman ang halin sa Iloilo City Traffic Management Unit (ICTMU), kag pito ang nakumpiska sang Public Safety Office.
Ginpahayag man sang alkalde nga tuyo sang city government nga libuton ang tanan nga mga establisyemento sa syudad kag kun matumod nga nagabaligya sang modified mufflers, ipasirado ini.
Nagpasalig naman ang natungdan sang mas masangkad nga pagbantay sa mga motorista agud madula na sa dalan sang syudad ang ginakabig makadisturbo nga mufflers.
