ILOILO CITY — Ginlimitahan na sa duha tubtob tatlo ka gallon sang tubig ang ginapanagtag sang Iloilo City Government sa mga residente sang Barangay Zamora-Melliza, Iloilo City.
Sa interview sang Bombo Radyo kay Yuri Villanueva, barangay kagawad sang nasambit nga lugar, iya ginpahayag nga may naka-alokar nga 16,000 liters para sa ila barangay apang indi makaigo sa ila nga available nga water tankers.
Suno kay Villanueva, may yara sila sang walo lang ka mga water tankers, sa diin, masobra 9,850 liters lamang ang posible nga ma-cater ukon masulod diri.
Ginpahayag man ni Villanueva nga tagsa ka zona sang ila barangay ang may yara sang water tanker kag agud nga matatapan sila, ginlimitahan na lang ang ginrasyon nga tubig.
Nahibaluan nga kapin 300 households kag masobra 1,000 ka mga indibidwal sa amo nga barangay ang naapektohan sang water shortage sa diin, halos alat nga tubig ang unod sang ila mga bubon.
Bangud diri, masami nga nagabakal na lang ang mga pumuluyo sang tubig ilimnon kag pan-ligo.
