ILOILO — Natigayon na nga ma-endorso sa Overseas Workers Welfare Administration (OWWA) ang kaso sang isa ka Ilongga nga Overseas Filipino Worker nga ginsakit sang iya amo sa Saudi Arabia.
Ini amo si Karen Joy Sabido, may tatlo ka mga anak, kag residente sang Lemery, Iloilo.
Sa interview sang Bombo Radyo kay Nestor Sabido, amay sang OFW, iya ginpahayag nga suno sa ahensya, ginalantaw na nga i-repartriate ang anak sini agud makapauli na diri sa Iloilo.
Suno kay Sabido, nagpakig-angot na ang OWWA sa employer sang iya anak nga United Placeman Philippines Inc. agud mapalab-ot sa konsulado ang kaso kag gilayon nga matutokan.
Ginpahayag man sini nga gin-abisohan sila sang ahensya nga maghulat-hulat lang anay kag kun may impormasyon nga mabaton kaangot sa ila himata, gilayon ini nga ipahibalo sa ila.
Apang nagapabilin nga indi mapahamtang ang iya amay bangud sa pila na ka adlaw nga wala sila naka-istoryahanay sang iya anak.
Nahibaluan nga kapin duha na ka bulan nga nagapanganmo ang OFW sa Saudi Arabia agud mahatagan sang maayo nga buwas-damlag ang iya mga anak kag nabilin nga pamilya.
Matandaan nga nagsugod ang pagbinaisay sang OFW kag amo sini, matapos nga wala mabuksan ang pwertahan sang ila puluy-an.
Gilayon naman nga ginlagas kag ginhampak sang amo ang biktima rason nga nagkuha ini sang video.
