ILOILO — Gin-ako ni Iloilo 2nd District Representative Michael ” Mike” Gorriceta nga madamo pa siya sang proyekto nga kinahanglan nga tapuson sa distrito.
Ini ang kasunod sang pagbuyagyag ni Uswag Ilonggo Representative James “Jojo” Ang nga indi magpadalagan si Gorriceta bilang bise-gobernador ni Iloilo Governor Arthur Defensor, Jr.
Sa interview sang Bombo Radyo kay Gorriceta, iya ginpahayag nga apisar nga ginhambal na ni Ang nga indi siya magpadalagan, bukas sa gihapon ang mamalidha sa mga posibilidad bangud malawig pa ang tyempo antes ang filing sang candidacy para sa 2025 elections.
Suno kay Gorriceta, kun ano man ang mga posible matabo, padayunon sini sa gihapon ang pagserbisyo sa segundo distrito sang Iloilo.
Nagpaatahag man ang natungdan nga indi ini maghalin Nacionalista Party kag wala sang plano nga magsaylo pa sa iban nga partido.
Una naman nga ginpahayag ni Iloilo Governor Arthur Defensor Jr. nga wala pa sang sin-o man ang nagpadulong sa iya agud nga mangumbinsi nga mangin ka-tandem sini sa palaabuton nga eleksyon.
