ILOILO — Gin-aprubahan na sang Committee on Disaster Risk Reduction and Management sang Iloilo Provincial Government ang P75 million nga mitigating response and recovery measures sa idalum sang Resolution No. 06, Series of 2024.
Ini kasunod sang deklarasyon sang state of calamity sa Iloilo Province bangud sa epekto sang El Niño Phenomenon.
Sa ginpatigayon nga committee hearing, lakip sa suhestyon ang quick response fund sang probinsya nga balor P61 million nga dapat ihatag sa mga pumuluyo agud gilayon nga makaresponde sa mga naapektohan sang El Niño.
Nalakip man sa hearing ang tubig nga kinahanglanon sang mga residente bangud nagaguwa sa report sang Provincial Disaster Risk Reduction and Management Council (PDRRMC) nga may 355 ka mga barangay sa probinsya sang Iloilo ang ginakulang sang tubig.
Nagkoordinar naman ang ahensya sa Iloilo Provincial Social Welfare And Development Office agud istoryahan ang pondo sang welfare goods kaangay sang mga de lata, bugas, kape, gatas, noodles, kag iban pa nga bulig nga ihatag sa mga naapektohan.
Nahibaluan nga naglab-ot na sa 15 ka mga banwa sa probinsya ang nagdeklarar sang state of calamity bangud man sa El Niño Phenomenon.
