Matapos ang duha ka bulan nga pahuway, liwat nga nagbalik sa porma ang Filipino pole vault star nga si EJ Obiena kag nakabulsa sang bulawan nga medalya sa Los Angeles Grand Prix sa Estados Unidos sang Amerika.
Isahanon si Obiena nga nakalapaw sa 5.80-meters nga amo ang standard mark nga gin-set sini sa kaugalingon samtang nagahilapit ang Paris Olympics.
Ini man ang iya ikatatlo nga gold medal subong nga tuig matapos nagpangibabaw man sa Memorial Josip Gasparac indoor event sa Croatia kag ISTAF Indoor 2024 sa Berlin, Germany sang Pebrero.
Sa Los Angeles, nalutos ni Obiena ang apat ka iban pa nga myembro sang exclusive six-meter club nga sanday KC Lightfoot, Chris Nilsen, kag Sam Kendricks sang United States kag Sondre Guttormsen sang Norway.
Makabig man ini nga bounce-back performance para kay Obiena matapos ini nagsarurot sa pang-siyam nga pwesto lamang sa World Athletics Indoor Championships sa Glasgow, Scotland sang nagligad nga Marso.
World No. 2 si Obiena sa rankings kag natalana sini nga itiglawas ang Pilipinas sa Paris Olympics sa Hulyo kun sa diin masugata sini ang World No. 1 kag reigning Olympic champion nga so Armand Duplantis sang Sweden.
