ILOILO — Gilayon nga nagpatawag sang zoom conference kaupod ang mga head sang tagsa ka units sang Iloilo Police Provincial Office (IPPO) kasunod sang paglapta sang video nga may nagakatulog nga pulis sa San Enrique Municipal Police Station.
Sa interview sang Bombo Radyo kay Police Colonel Bayani Razalan, Director sang IPPO, iya ginpahayag nga wala ginapahanugutan ang ila katapo nga magtulog samtang sila ang on duty agud ma-maintain ang peace and order sa isa ka lugar.
Suno kay Razalan, ginapahanugutan ang mga police station nga magsirado sang istasyon ilabi na kun malapit sa presensya sang Communist Terrorist Group (CTG) kaangay na lamang sa Alimodian kag Maasin Municipal Police Station.
Gin-athag man sini nga ang tagsa ka pulis ang may responsibilidad nga magbantay 24 oras agud gilayon nga ma-address ang ano man nga emerhensya.
Nahibaluan nga gindagdagan na sang memorandum ang hepe sang San Enrique MPS agud magsabat kag masolbar ang nasambit nga issue.
