Ipakita sang bug-os nga pwersa sang Ilonggo pageant fans ang suporta para sa tiglawas sang Iloilo City nga si Alexie Mae Caimoso Brooks para sa koronasyon sang Miss Universe Philippines 2024 subong nga adlaw, Mayo 22.
Sa Leon, Iloilo nga hometown sang Filipino-American beauty queen, preparado na ang plaza para sa public viewing nga magasugod 7:00 karon sa gab-i kag buksan nga libre para sa tanan.
Si Mayor Malin Cabana-Holipas nga magapadulong gid sa Metro Manila para makalantaw sang live coronation night ang nagpanawagan man sa tanan nga mga Ilonggo nga mag-isa sa pagpakita sang suporta kay Brooks nga isa sa ginalantaw magapauli sang korona.
“Ang bilog nga banwa kang Leon naga paabot gid kang bug-os nga suporta sa amon kasimanwa kag bugal kang Leon, Alexie Caimoso Brooks. Ang iya kadalag-an, kadalagan kang bilog nga banwa kag mga pumuluyo kang Leon,” kabahin sang pahayag sang alcalde.
Sa bulig sang boto sang mga fans, sulod si Brooks sa finalists sang tanan nga challenges antes ang coronation night kag nalakip man sa Top 3 ang iya “Ugto-Ugto” performance sa Best in National Costume.
53 ka mga kandidata ang magapaindis-indis subong nga adlaw para makabulos sa korona ni reigning queen Michelle Dee.
Isa man ini ka interesante nga edisyon sang pageant bangud sa pila ka butang: ang delegates ang ginpili paagi sa Accredited Partners Program, may mga kandidata nga nagatiglawas sa overseas Filipino communities, kag wala na sang age restrictions para sa mga magapasakop.
Magluwas sa main crown, may apat ka iban pa nga korona para sa sini nga pageant nga magahatag sang oportunidad sa winners nga itiglawas ang Pilipinas sa international pageants.
Magadul-ong man ang Bombo Radyo sang updates sa coronation night nga magasugod 8:00 karon sa gab-i sa Mall of Asia Arena sa Pasay.#
