Gin-athag sang Department of Health (DOH) nga wala sang ipatuman nga travel restrictions apisar sang paglutaw sang bag-o nga COVID-19 variants kag pagsaka sang numero sang kaso sini sa iban nga mga pungsod.
Sa statement, ginpahayag nga wala pa sang nakit-an ang ahensya nga scientific basis para iimplementar ang travel ban sa Pilipinas.
Ginpasalig man sini ang publiko nga wala-untat ang ila pag-track sa COVID-19 case counts kag sa newly designated variants nga nakasunod man sa kun ano ang international developments.
“The Department remains to be in close coordination with international health authorities and its Bureau of Quarantine is keeping watch over points of entry nationwide,” pahayag sang ahensya.
Tanan nga rehiyon sa Pilipinas ang nagapabilin man nga low risk para sa COVID-19.
Sa reports sang DOH Data Collect application, 116 severe kag critical COVID-19 cases ang naadmit sa mga ospital. Halin sang Mayo 7-13, may yara sang 877 new cases nga na-report ukon may daily average sang 125 cases. Lima naman ka patay ang narekord halin sang Abril 30-Mayo 13.
Matandaan nga nag-report ang World Health Organization sang tatlo ka COVID-19 variants nga napaidalom sa monitoring: JN.1.18, KP.2 kag KP.3 nga pareho nga descendants sang JN.1.
Ginapanugyan sang DOH ang boluntaryo nga paggamit sang face masks kag iban pa nga standard precautions kaangay sang hand washing, paglikaw sa magutok nga mga lugar ukon mga lugar nga madamo sang tawo.#
