ILOILO CITY — Wala na nasurpresa sa pag-ilis sang liderato sang senado si Former Senator Franklin Drilon.
Ini kasunod sang pag-eleher kay Senator Francis Joseph “Chiz” Escudero bilang bag-o nga senate president.
Sa interview sang Bombo Radyo kay Drilon, iya ginpahayag nga ang amo nga hitabo ang iya naman nga na-eksperyensyahan sa apat ka beses nga nagpungko ini bilang senate president sang senado.
Suno kay Drilon, para sa iya, wala sang ini makita nga problema sa liderato ni Escudero bangud maalam, mapisan, kag kwalipikado man ang senador sa amo nga posisyon.
Ginpahayag naman ang anay senador nga ang pagbaylo sang liderato sa senado ang nagapakita sang kahinaan sang political party system sang administrasyon.
Nagapati man ini nga ang desisyon sang bag-o nga liderato ang nakabase sa personal agenda kag wala nakabase sa plataporma sang political party.
