ILOILO CITY — Magapatigayon sang pagpaninlo sang Phase 3 sang 69KV lines sang MORE Electric Power Corporation sa Mayo 26, 2024 sa diin, may mga lugar nga maapektohan sa Iloilo City.
Sa interview sang Bombo Radyo kay Ms. Joy Fantilaga, spokersperson sang MORE Power, iya ginpahayag nga magalab-ot sa 11 hours ang power interruption sa feeders 2,4, 5, kag 6 sang Megaworld; feeders 2 kag 3 naman sa Mandurriao; feeder 5 sang Molo, feeder 1 sang Mobile, kag feeders 2 kag 4 sang Diversion.
Suno kay Fantilaga, ang mga nasambit nga feeders ang magasugod interrupt sang kuryente sugod las-5:00 sa aga tubtob las-4:00 sa hapon.
Ginpahayag man sini nga may patigayunon man nga load transfer agud mabuhinan ang mga lugar nga naapektohan sang 11 ka oras nga power interruption sa diin, may mga lugar man nga maapektohan sang load transfer.
Lakip sa mga apektado amo ang feeders 1 kag 2 sang Jaro; feeders 1 kag 5 sang Mandurriao, kag feeder 1 sang Megaworld, sa diin, magalab-ot sa 3 ka oras kag 30 minutos ang power interruption sugod las-5:00 sa aga tubtob las-7:00 sa aga kag las-2:30 sa hapon tubtob las-4:00 sa hapon.
Sugod naman las-5:00 sa aga tubtob las-6:30 sa aga kag las-2:30 sa hapon tubtob las-4:00 sa hapon, may patigayunon man nga power interruption sa feeders 1, 2, 3, 4 sang Molo, feeder 1 sang Megaworld kag porsyon sang Lapaz feeder 1.
Nahibaluan nga ang patigayunon nga interruption ang yara sa 53% sang franchise area sang MORE, sa diin, 47% diri ang magapabilin nga may kuryente.
