ILOILO — Istoryahon ni Iloilo Governor Arthur Defensor Jr. si Estancia, Iloilo Mayor Mary Lynn Mosqueda kasunod sang pagpasaka sini sang kaso batok sa mga Sangguninang Bayan Members, SK Federation President, Liga ng mga Barangay President, Sangguniang Bayan Secretary kag Vice Mayor sang Estancia bangud sa masami nga pagbuhin sang iya proposed budget.
Ini ang nagtulod sa alkalde nga mapasaka sang kaso nga paglapas sa Section 3(e) sang Republic Act 3019 ukon Anti-Graft and Corrupt Practices Act kag Abuse of Authority, Gross Neglect of Duty, Misconduct, Oppression, Republic Act 7610 kag Dereliction of Duty.
Sa interview sang Bombo Radyo kay Defensor, iya ginpahayag nga tuyo sini nga personal nga mahibaluan ang rason sang pagpasaka sang kaso ni Mayor Mosqueda batok sa mga opisyales sang nasambit nga banwa.
Suno kay Defensor, wala siya sang ideya sang pagpasaka sang kaso ni Mosqueda, apang nakalab-ot ini sa iya nga atensyon.
Ginpahayag man ni Defensor nga apisar nga indi sila kaupod sa pulitika, padayon ini nga nagabulig sa banwa sang Estancia, sa diin, sang damlag lang, may ginpatigayon nga ground breaking para sa P5 million nga proyekto.
Nahibaluan nga sang nagligad nga mga eleksyon, apisar nga pila lamang ka mga kandidato sa banwa sang Estancia ang nagsuporta kay Defensor, nagdaug ini sa gihapon sa amo nga banwa.
