TIGBUAN, ILOILO — Patay ang isa ka lalaki matapos nga nalumos samtang nagalangoy sa baybayon sang Barangay Baguingin, Tigbauan, Iloilo.
Ang biktima amo si Julio Montaña, 54, residente sang Brgy. Janipaan Este, Cabatuan, Iloilo.
Sa interview sang Bombo Radyo Police Master Sergeant Amy Acebedo, imbestigador sang Tigbauan Municipal Police Station, iya ginpahayag nga may impluwensya sang makahulubog nga ilimnon ang biktima sa diin, naglangoy ini malayo sa ila nga cottages.
Suno kay Acebedo, kaupod sang biktima ang iya himata nga nagpaligo sa resort kasunod man sang bag-o lang nalubong nga ila himata rason nga nagpadulong sila sa baybay bilang isa ka pamilya.
Ginpahayag man sini nga nakalab-ot sa madalum nga porsyon sang baybay ang biktima kabangdanan man sang iya pagkalumos.
Gindala pa sa pinakamalapit nga ospital ang biktima, apang ginbawian gid ini sang kabuhi.
