ILOILO CITY — Nagapati ang isa ka doctor nga dako ang importansya sang maxillofacial surgery sa Pilipinas bangud indi lang ini makahatag sang confidence, makabulig man ini sa pagpaanyag sang nawong.
Sa interview sang Bombo Radyo kay Dr. Philip Jan Arenga, eksperto sa head and neck surgery sang Fellow Philippine Society of Otorhinolaryngology, iya ginpahayag nga ang maxillofacial ang isa ka operasyon agud insaktuhon ang mga na-dislocate kag na-defect nga itsura sang isa ka tawo.
Suno kay Arenga, makabulig man ini sa pag-reconstruct sang facial skeletal features ilabi na kun nakaagi aksidente sa motor kag naguba gid ang guya.
Ginpahayag man sini ang surgery ang sakop ang pagkuha sang mga tumor kag mga bukol nga nagatubo sa itsura sang isa ka tawo.
Tuyo sang amo nga operasyon ang mabalik sa insakto nga posisyon ang mga facial features nga nabali ukon naglain kaangay na lamang sang movements sang aton mga mata.
Indi lamang sa fractures ang focus sang maxillofacial surgery, sa diin, may yara man ini sang constructive, congenital, kag acquired diseases sang facial skeleton.
