Nagtaliwan na sa edad nga 80-anyos ang Filipino comic strip creator, director, kag producer nga si Carlo J. Caparas.
Ginkumpirma ini sang iya anak nga si Peach paagi sa isa ka tula nga “Sa Bawat Tipa ng Makinilya” kun sa diin ginmensyonar ang pila sini ka popular nga binuhatan sang iya amay.
“Sa larangan ng komiks siya ang naghari, naging bahagi ng kultura, naging yaman ng lahi / Umabot sa lona ng pinilakang tabing, hinangaan, pinalakpakan ng bayang magiting / Subalit buhay ay sadyang may wakas / ‘Pack up na Direk.’ Oras na ng uwian,” kabahin sang linya sini.
Wala ginmensyonar ang rason sang kamatayon sini, apang subong nga adlaw, Mayo 27, magaumpisa ang haya sa Golden Haven Memorial Chapels and Crematorium sa Las Pi as City.
Kilala si Caparas nga “Komiks King” sa Pilipinas nga amo ang nagpabantog sa Pinoy superheroes kag comic book characters kaangay sa Panday, Bakekang, Totoy Bato, Joaquin Bordado, Kamandag, Elias Paniki, Tasya Fantasya, Gagambino, kag Pieta.
Bilang filmmaker naman, lakip sa iya inobrahan amo ang “Ang Babaeng Hinugot sa Aking Tadyang”, Kamagong, Kambal Na Kamao: Madugong Engkwentro, Ayaw Matulog ng Gabi, Hiwaga ng Panday, kag Chavit.
Nangin kilala man ini sa iya hit massacre films lakip ang Kuratong Baleleng kag ang The Cory Quirino Kidnap: NBI Files.
Sang 2008, nabaton sini ang Sagisag Balagtas Award halin sa Pambansang Samahan ng Mga Tagamasid at Tagataguyod ng Filipino (PASATAF) kadungan sang ika-52 nga anibersaryo sa Teacher’s Camp sa Baguio City.
Ginkilala man si Caparas nga National Artist of the Philippines for Visual Arts and Film sang 2009 sang tion ni anay President Gloria Macapagal Arroyo, apang gin-nullify sang Supreme Court sang Hulyo 2013 bangud sa ginpahayag nga grave abuse of discretion.
